Brownies (o kung gaano kita kamahal)
"Ang pag-ibig ay parang pagluluto, kailangan ng tamang sangkap at proseso."
1 c butter/margarine
1 c cocoa powder
1 c white sugar
1 1/2 c brown sugar
3 eggs
1 tsp vanilla essence
1 1/2 c flour
1 tsp baking powder
1 tsp salt
Painitin ang oven sa 350 F. Tunawin ang mantikilya. Ilagay sa mixing bowl.
Aaminin ko, nagkagusto ako sa iyo dahil nakatutunaw ang iyong lambing. Dahil sa iyo nakipaghiwalay sa akin ang aking pag-iisa.
Ihalo ang tsokolate, pampalasa.
At hindi lang iyon—napapansin ko kung gaano kaganda ang iyong mata, kung gaano kasarap pakinggan ang boses mo, at kung gaano ka ka-hinhin. Masarap kang kausap at naiintindihan mo ako tuwing inaakala ko na walang nakakaintindi sa akin. Malalim ka palang mag-isip- palaging may katuturan ang mga napag-uusapan natin.
Isunod ang asukal, pampatamis.
Sweet ka pala. Di ko inakalang may nag-aalala para sa akin. At sobra kang nakakatuwa, para kang batang naglalaro sa dapit-hapon. Kinikilig ako kapag nagpapatintero ang titigan ng ating mga mata. Napapangiti ako tuwing para tayong nagtataguan kapag hindi tayo nag-aabot sa kitaan.
Ihalo ang itlog para pagsamahin ang mga sangkap
Siguro nga nasa iyo na ang lahat ng hinahahanap ko.
Lagyan ng vanilla, pampabango at pampasarap.
Isa lang ang masasabi ko—mahal n mahal n nga kita.
Pagkatapos ay ihalo ang harina, nagsisilbing katawan at laman.
Mahal kita, hindi dahil sa ikaw ang pinakamaganda, pinakamabait o pinakamalambing na babaeng nakita ko—marami pa ang hihigit sa iyo. Importante ka sa akin dahil ikaw ay ikaw at ako ay ako- ikaw ang pinili ko, nakasama, nakausap, nayakap, nakadaupang-palad, at ipinagluto. Kahit na marami ang mas maganda, mas malambing, at mas mabait sa iyo, ikaw pa rin ang babalikan ko.
Idagdag ang baking powder, pampaalsa, at ang asin, pampalasa.
Pero mahirap kapag di tayo nagkikita. Mahirap lumago ang pagmamahal kung taning hangin lang ang katagpo. Mapait at maalat kumbaga.
LInyahan ng mantikilya ang isang 13 in. x 9 in. baking pan. Ilipat dito ang lahat ng hinalo. Lutuin sa oven ng 30 minuto o hanggang wala nang dumikit kapag itinusok ang isang toothpick sa gitna.
Sa bagay, makakapaghintay naman ako. Hayaan nating uminit at lumalim ang pag-ibig natin sa isat’ isa—sumasarap habang tumatagal. Sa huli, laging mas masarap kapag pinatagal ang pagluluto.
Ihahain ko na, mahal
